ഷാനവാസ്. എസ് | കൊച്ചി, ആഗസ്റ്റ് 22, 2011 16:14
ദൈവത്തിന്‍റെ സ്വന്തം നാട് വര്‍ഷങ്ങള്‍ക്ക് മുമ്പ് അന്തരിച്ച ചിത്രകാരന്‍ എം എഫ് ഹുസൈനെക്കൊണ്ട് ചിത്രപരമ്പര വരപ്പിച്ചു. കേരളത്തിന്‍റെ വര്‍ണങ്ങള്‍ പകര്‍ത്തുകയായിരുന്നു ലക്ഷ്യം. ആ ചിത്രപരമ്പരയ്ക്ക്കല്യാണിക്കുട്ടിയുടെ കേരളം എന്നാണ് പേരിട്ടത്. ഇന്ന്, കേരളം കല്യാണിക്കുട്ടിമാര്‍ക്ക് ജീവിക്കാന്‍ (വഴിനടക്കാന്‍ പോലും) പറ്റാത്ത നാടായി മാറിയിരിക്കുന്നു. കണക്കുകള്‍ വെളിപ്പെടുത്തുന്നത് ഒരു നാടിന്‍റെ അധഃപതനമാണ്.ലൈംഗിക അരാജകത്വത്തിന്‍റെ നാട് എന്ന് പദവിയിലേക്ക് കേരളം അതിവേഗം ബഹൂദൂരം കുതിക്കുകയാണ്. ചില വസ്തുതകള്‍
- ബലാത്സംഗവും സ്ത്രീപീഡനവും എക്കാലത്തെയും ഉയര്‍ന്ന നിലയിലേക്ക്
- ദിവസവും പത്ത് സ്ത്രീപീഡനങ്ങള്‍/ബലാത്സംഗങ്ങള്‍
- ഈ വര്‍ഷം ഇതുവരെ 546 ബലാത്സംഗകേസുകള്‍
- ഈവര്‍ഷം ജൂണ് വരെ 1816 സ്ത്രീപീഡന കേസുകള്‍
- 96 ബലാത്സംഗകേസുകളുമായി കാസര്‍ഗോഡ് ഒന്നാമത്
- പൊതുസ്ഥലത്തെ ലൈംഗികാതിക്രമങ്ങള്‍ 347
- സ്ത്രീകളെ തട്ടിക്കൊണ്ടുപോകല്‍ 101
ലൈംഗിക അതിക്രമങ്ങളെക്കുറിച്ചുളള വാര്‍ത്തകള്‍ കേരളത്തിലിന്ന് സര്‍വ്വസാധാരണമായിരിക്കുന്നു. ദിവസവും കുറഞ്ഞത് പത്ത് സംഭവങ്ങളാണ് സംസ്ഥാനത്ത് ഉണ്ടായിക്കൊണ്ടിരിക്കുന്നത്. ഇവയില്‍ 95 ശതമാനത്തിലധികവും സ്ത്രീകള്‍ക്കെതിരെയാണ് നടക്കുന്നത്. മൂന്ന് വയസുളള പെണ്‍കുട്ടി മുതല്‍ 80 കഴിഞ്ഞ വൃദ്ധ വരെ ഇത്തരത്തില്‍ ഇരയാകുന്നുവെന്നതാണ് ആശങ്കാജനകമായ വസ്തുത. കഴിഞ്ഞകാലങ്ങളില്‍ കൊലപാതക, മോഷണ കേസുകളാണ് സംസ്ഥാനത്ത് വര്‍ധിച്ചിരുന്നതെങ്കില്‍ ഇപ്പോള്‍ സ്ത്രീകള്‍ക്കെതിരായ അതിക്രമങ്ങളുടെ, പ്രത്യേകിച്ചും ലൈഗിംകാതിക്രമങ്ങളുടെ കാര്യത്തിലാണ് ക്രമാതീതമായ വര്‍ധന കാണാനാകുന്നത്. വികലമായ ലൈംഗിക കാഴ്ചപ്പാടുകളെ അനുകരിക്കാനും ആവര്‍ത്തിക്കാനും വെമ്പുന്ന കേരളം അതിവേഗം ലൈംഗിക അരാജകത്വത്തിലേക്ക് വീഴുകയാണോ എന്ന സംശയത്തിനിട നല്‍കുന്നതാണ് പുതിയ സ്ഥിതിവിശേഷം.
സ്ത്രീകള്‍ക്കെതിരായ അക്രമങ്ങള്‍ ക്രമാതീതമായി വര്‍ധിച്ചിരിക്കുന്നതായാണ് ക്രൈം റെക്കോഡ്സ് ബ്യൂറോ പുറത്തുവിട്ട അര്‍ധ വാര്‍ഷിക റിപ്പോര്‍ട്ടുകള്‍ സൂചിപ്പിക്കുന്നത്. 2011 ജൂണ് വരെയുളള ആറു മാസത്തെ, റിപ്പോര്‍ട്ടു ചെയ്യപ്പെട്ടിട്ടുളള കേസുകളുടെ എണ്ണമാണ് ബ്യൂറോ പ്രസിദ്ധീകരിച്ചത്. സ്ത്രീകള്‍ക്കെതിരായ അതിക്രമങ്ങളില്‍ ബലാത്സംഗത്തിന്‍റെയും പീഡനത്തിന്‍റെയും എണ്ണം എക്കാലത്തെയും ഉയര്‍ന്ന നിലയിലേക്ക് കുതിക്കുകയാണെന്ന് കണക്കുകള്‍ വ്യക്തമാക്കുന്നു.
2010ല്‍ ആകെ 617 ബലാത്സംഗ കേസുകള്‍ റിപ്പോര്‍ട്ടു ചെയ്ത സ്ഥാനത്ത് ഈ വര്‍ഷം ഇതുവരെ 546 കേസുകളാണ് റിപ്പോര്‍ട്ട് ചെയ്തിട്ടുളളത്. മുന്‍ വര്‍ഷങ്ങളില്‍ ഇത് 500 (2007), 548 (2008), 554 (2009) എന്നിങ്ങനെയായിരുന്നു. 96 കേസുകള്‍ റിപ്പോര്‍ട്ടു ചെയ്തിട്ടുളള കാസര്‍ഗോഡ് ആണ് ബലാത്സംഗ കേസില്‍ ഒന്നാം സ്ഥാനത്തുളളത്. പീഡനങ്ങളുടെ കാര്യത്തില്‍ 2011 ജൂണ് വരെ 1816 കേസുകള്‍ റിപ്പോര്‍ട്ട് ചെയ്തിട്ടുണ്ട്. 2010ല്‍ ആകെ പീഡനക്കേസുകള്‍ 2939 ആയിരുന്നു. 2007ല്‍ ഇത് 2604, 2008ല്‍ 2756, 2009ല്‍ 2539 എന്നിങ്ങനെയായിരുന്നു. 165 കേസുകളുമായി കൊല്ലം സിറ്റിയാണ് ഇക്കാര്യത്തില്‍ മുന്നിലുളളത്.
2011 ജൂണ് വരെ, സ്ത്രീകളെ തട്ടിക്കൊണ്ടുപോയതുമായി ബന്ധപ്പെട്ട് 101 കേസുകളാണ് സംസ്ഥാനത്ത് റിപ്പോര്‍ട്ട് ചെയ്തിട്ടുളളത്. 11 വീതം കേസുകളുമായി തൃശൂരും കൊല്ലം സിറ്റിയുമാണ് മുന്നില്‍. 2007, 2008, 2009, 2010 വര്‍ഷങ്ങളില്‍ ഇത് യഥാക്രമം 166, 167, 171, 175 എന്നിങ്ങനെയായിരുന്നു. പൊതുസ്ഥലത്തെ ലൈംഗികാതിക്രമങ്ങള്‍ സംബന്ധിച്ച് ഇതുവരെയുളള കേസുകള്‍ 347 ആണ്. കഴിഞ്ഞവര്‍ഷമിത് 539 ആയിരുന്നു. 66 കേസുകളോടെ കോഴിക്കോട് സിറ്റിയാണ് പട്ടികയില്‍ മുന്നിലുളളത്.
സ്ത്രീധന മരണത്തിന്‍റെ കാര്യത്തില്‍ മാത്രമാണ് അല്‍പ്പമെങ്കിലും കുറവ് കാണാനാകുന്നത്. ഇതുവരെ ആറ് കേസുകള്‍ മാത്രമാണ് റിപ്പോര്‍ട്ടു ചെയ്തിട്ടുളളത്. കഴിഞ്ഞ വര്‍ഷം സ്ത്രീധന മരണം 21 ആയിരുന്നു. 2007ല്‍ 22ഉം, 2008ല്‍ 25ഉം, 2009ല്‍ 21ഉം കേസുകള്‍ സ്ത്രീധന മരണവുമായി ബന്ധപ്പെട്ട് റിപ്പോര്‍ട്ടു ചെയ്തിരുന്നു. ഈ വര്‍ഷം ഇതുവരെ പാലക്കാട് നിന്നും രണ്ടും കോട്ടയം, എറണാകുളം റൂറല്‍, തൃശൂര്‍ സിറ്റി, കണ്ണൂര്‍ എന്നിവിടങ്ങളില്‍ നിന്നും ഒരോ കേസും റിപ്പോര്‍ട്ട് ചെയ്തിട്ടുണ്ട്.
ഭര്‍ത്താവ് അല്ലെങ്കില്‍ ബന്ധുക്കളില്‍ നിന്നുളള പീഡനങ്ങള്‍ സംബന്ധിച്ച കേസുകളുടെ എണ്ണം 2679 ആണ്. കഴിഞ്ഞവര്‍ഷം 4788 ആയിരുന്നു. 2007ല്‍ 3976 കേസുകളും 2008ല്‍ 4135 കേസുകളും 2009ല്‍ 3976 കേസുകളും റിപ്പോര്‍ട്ട് ചെയ്തിരുന്നു. ജൂണ് വരെ 340 കേസുകള്‍ റിപ്പോര്‍ട്ട് ചെയ്ത മലപ്പുറമാണ് പട്ടികയില്‍ മുന്നിലുളളത്. സ്ത്രീകള്‍ക്കെതിരായ മറ്റു കുറ്റകൃത്യങ്ങളുടെ കാര്യത്തില്‍, 2011 ജൂണ് വരെ ആകെ 1109 കേസുകള്‍ റിപ്പോര്‍ട്ട് ചെയ്തിട്ടുണ്ട്. തൃശൂര്‍ സിറ്റിയില്‍ മാത്രം 159 കേസുകള്‍ റിപ്പോര്‍ട്ട് ചെയ്തു. 1851 (2007), 1820 (2008), 1699 (2009), 1702 (2010) എന്നിങ്ങനെയായിരുന്നു മുന്‍ വര്‍ഷങ്ങളിലെ കണക്കുകള്‍.
ബലാത്സംഗം, പീഡനം തുടങ്ങി സ്ത്രീകള്‍ക്കെതിരെയുളള അതിക്രമങ്ങളെക്കുറിച്ച് ഈ വര്‍ഷം ജൂണ് വരെ 6604 കേസുകളാണ് റിപ്പോര്‍ട്ട് ചെയ്തിരിക്കുന്നത്. ആകെ 632 കേസുകള്‍ റിപ്പോര്‍ട്ട് ചെയ്തിരിക്കുന്ന മലപ്പുറം ആണ് സ്ത്രീകള്‍ക്കെതിരായ അതിക്രമങ്ങളുടെ കാര്യത്തില്‍ ഒന്നാം സ്ഥാനത്തുളളത്. 18 കേസുകളുമായി റെയില്‍വേ ആണ് പട്ടികയില്‍ ഏറ്റവും താഴെയുളളത്. 2010ല്‍ ആകെ കേസുകള്‍ 10781 ആയിരുന്നു. 2007ല്‍ 9381 കേസുകളും 2008ല്‍ 9706 കേസുകളും 2009ല്‍ 9354 കേസുകളും റിപ്പോര്‍ട്ട് ചെയ്തിരുന്നു.
ഇവിടെ പറഞ്ഞിരിക്കുന്ന കണക്കുകളില്‍ മാത്രം ഒതുങ്ങുന്നതല്ല സംസ്ഥാനത്തെ സ്ത്രീകള്‍ക്കെതിരായ അതിക്രമങ്ങള്‍. ഇതെല്ലാം പൊലീസ് സ്റ്റേഷനില്‍ റിപ്പോര്‍ട്ട് ചെയ്യപ്പെട്ടിളളവയുടെ എണ്ണം മാത്രമാണ്. ഏതെങ്കിലും വിധത്തിലുളള അതിക്രമങ്ങള്‍ക്ക് ഇരയാകുന്ന സ്ത്രീകളില്‍ ചെറിയ ശതമാനമെ പൊലീസ് സ്റ്റേഷനിലോ, കുടുംബകോടതികളിലോ, വനിതാ കമ്മീഷനിലോ, സ്ത്രീവേദി പോലുളള മറ്റേതെങ്കിലും സംഘടനകളിലോ പരാതി നല്‍കുന്നുളളു. 2002ലെ നാഷണല്‍ ക്രൈം റെക്കോഡ്സ് ബ്യൂറോ റിപ്പോര്‍ട്ട് പ്രകാരം ഇന്‍ഡ്യയില്‍ ഒരോ 3.5 മിനുറ്റിലും സ്ത്രീകള്‍ക്കെതിരായ ഒരു കുറ്റകൃത്യം നടക്കുന്നുണ്ടെന്നാണ്. അങ്ങനെ വലിയൊരു ശതമാനം കേസുകളും റിപ്പോര്‍ട്ടു ചെയ്യപ്പെടാതെ പോകുന്നു. 2010 ആകുമ്പോള്‍ രാജ്യത്തെ ജനസംഖ്യാ വര്‍ധന നിരക്കിനേക്കാള്‍ വളരെ ഉയര്‍ന്നതായിരിക്കും സ്ത്രീകള്‍ക്കെതിരായ അതിക്രമങ്ങളുടെ നിരക്കെന്ന് 1998ല്‍ നാഷണല്‍ ക്രൈം റെക്കോഡ്സ് ബ്യൂറോ തന്നെ റിപ്പോര്‍ട്ട് ചെയ്തിരുന്നതു കൂടി ചേര്‍ത്തു വായിക്കുമ്പോള്‍, നിലവിലുളള കണക്കുകള്‍ യാഥാര്‍ത്ഥ്യത്തിന്‍റെ ഒരംശം മാത്രമാണെന്ന് മനസിലാക്കാം.
കൊലപാതകങ്ങളും മോഷണങ്ങളുള്‍പ്പെടെയുളള കുറ്റകൃത്യങ്ങള്‍ക്ക് പഞ്ഞമില്ലാതിരുന്ന കേരളമിന്ന് ലൈംഗിക അതിക്രമങ്ങളുടെ വിളനിലമാണ്. കുട്ടികളും മുതിര്‍ന്നവരും പ്രായമായവരും ഒരുപോലെ ഇത്തരം അതിക്രമങ്ങള്‍ക്ക് ഇരയായിത്തീരുന്നുവെന്ന വസ്തുത സമൂഹത്തെയാകെ ബാധിച്ചിരിക്കുന്ന ഗുരുതരമായൊരു പ്രശ്നമാണിതെന്ന സത്യത്തിലേക്കാണ് വിരല്‍ ചൂണ്ടുന്നത്. സാക്ഷരതയിലും സാംസ്കാരിക മേഖലയിലും രാജ്യത്തിനും ലോകസമൂഹങ്ങള്‍ക്കും മാതൃകയായിട്ടുളള ഒരു സമൂഹം ഇത്തരത്തില്‍ നീങ്ങിക്കൊണ്ടിരിക്കുന്നത് ആപത്കരമായ പ്രവണതയാണ്. ഈ സ്ഥിതിയിലെങ്കിലും കാര്യങ്ങള്‍ നിയന്ത്രിച്ചു നിര്‍ത്താനാകുന്നില്ലെങ്കില്‍ ഒരു ലൈംഗിക അരാജകത്വത്തിന്‍റെ നാടെന്ന നിലയിലേക്കുള്ള കേരളത്തിന്‍റെ വളര്‍ച്ച അതിവേഗം ബഹുദൂരം ആയിരിക്കും. - http://thesundayindian.com/ml/story/kerala-the-most-dangerous-place-for-women/13/1246/
1999ല്‍ കോളെജിന് നാഷണല്‍ അസെസ്മെന്‍റ് ആന്‍റ് അക്രഡിറ്റേഷന്‍ കൌണ്‍സിലിന്‍റെ ഫൈവ് സ്റ്റാര്‍ പദവി ലഭിച്ചു.2004ല്‍ കോളെജിന് യൂണിവേഴ്സിറ്റി ഗ്രാന്‍റ്‌സ്‌ കമ്മീഷന്‍റെ സെന്‍റര്‍ വിത്ത് പൊട്ടന്‍ഷ്യല്‍ ഫോര്‍ എക്സലന്‍സ് പദവിയും 2009ല്‍ ന്യൂനപക്ഷ പദവിയും ലഭിച്ചു. 
മലയാളിയുടെ മാറുന്ന ഫാഷന്‍ സങ്കല്‍പ്പങ്ങളെക്കുറിച്ചുളള ചര്‍ച്ചകള്‍ക്ക് ഇനിയും ഒരു അവസാനം വന്നിട്ടില്ല. പുതുതലമുറയുടെ വസ്ത്ര സങ്കല്‍പ്പങ്ങളും വസ്ത്രധാരണ രീതികളും ശരിയോ തെറ്റോ, ഗുണമോ ദോഷമോ, സാന്മാര്‍ഗികമോ അസന്മാര്‍ഗിമോ എന്നിങ്ങനെയുളള ചൂടന്‍ ചര്‍ച്ചകള്‍ക്കിടയിലും കേരളം പുതിയ ഫാഷന്‍ സങ്കല്‍പ്പങ്ങളെ രണ്ടും കൈയും നീട്ടി സ്വീകരിക്കുന്നുവെന്നതാണ് വാസ്തവം. ചുരുക്കി പറഞ്ഞാല്‍, ഗ്രാമീണ, ശാലീന വേഷങ്ങളില്‍ നിന്നും നാഗരികതയുടെ, കുറച്ചുകൂടി കൃത്യമായി പറഞ്ഞാല്‍ സമകാലീന ഫാഷന്‍ സങ്കല്‍പ്പങ്ങളോട് ആഭിമുഖ്യം കാണിച്ചുതുടങ്ങിയ പുതു തലമുറ അവ പിന്തുടരുന്നതും വളരെ വേഗത്തിലാണ്. അങ്ങനെ, മാറുന്ന ഫാഷന്‍ സങ്കല്‍പ്പങ്ങളുടെ നേര്‍ക്കാഴ്ചയെന്നോണം കൊച്ചി ഇന്‍ഡ്യയിലെ അന്താരാഷ്ട്ര ശ്രദ്ധ നേടിയ ഫാഷന്‍ കേന്ദ്രങ്ങളുടെ പട്ടികയിലേക്കും എത്തിപ്പെടുകയാണ്.
ട്രെന്‍റുകള്‍ക്ക് പുറകെ സിനിമ പായുന്നത് ഇത് ആദ്യമായൊന്നുമല്ല. അത് ഗുരുതരമായ തെറ്റുമല്ല. എന്നാല്‍ അതൊരു രോഗലക്ഷണമാണ്. മുരടിപ്പിന്‍റെയും ഭാവനാശൂന്യതയുടെയും വ്യക്തമായ സൂചകങ്ങളുമാണവ.
നീലത്താമര തീയേറ്ററില്‍ നല്‍കിയ വിജയപാഠം പുതിയൊരു പ്രവണതക്ക് തുടക്കമിട്ടു. പദ്മരാജന്‍റെ തിരക്കഥയില്‍ ഭരതന്‍ സംവിധാനം ചെയ്ത, ഒരു കാലഘട്ടത്തിന്‍റെ തന്നെ രോമാഞ്ചമായിരുന്ന രതിനിര്‍വ്വേദം പുതിയ സിനിമാ ചട്ടക്കൂടില്‍ പുനര്‍നിര്‍മ്മിക്കപ്പെട്ടു. ടി.കെ രാജീവ് കുമാറായിരുന്നു സംവിധായകന്‍. കലാപരമായി അധികമൊന്നും അവകാശപ്പെടാനില്ലാഞ്ഞിട്ടും തീയേറ്ററുകളില്‍ ആളുകള്‍ ഇടിച്ചുകയറിയതോടെ സിനിമ പണം വാരിക്കൂട്ടി. അതിന്‍റെ തിരയിളക്കമാകണം, തകര, ‘എ’ സര്‍ട്ടിഫിക്കറ്റ് കിട്ടിയ ആദ്യ മലയാള സിനിമയായ അവളുടെ രാവുകള്‍, ഇതാ ഇവിടെ വരെ, നാടുവാഴികള്‍, വില്‍ക്കാനുണ്ട് സ്വപ്നങ്ങള്‍ (ഇവയാണ് ഇതുവരെ പ്രഖ്യാപിച്ചിരിക്കുന്നതെങ്കിലും ഇനിയും പ്രതീക്ഷിക്കാം) തുടങ്ങിയ സിനിമകള്‍ പുനര്‍ നിര്‍മ്മിക്കാന്‍ സിനിമാ നിര്‍മ്മാതാക്കളെ നിര്‍ബന്ധിച്ചത്. നീലത്താമരയും, രതിനിര്‍വ്വേദവും പുനര്‍നിര്‍മ്മിച്ച്, പുതിയ ട്രെന്‍ഡിന് തുടക്കമിട്ട ജി. സുരേഷ്കുമാറിന്‍റെ രേവതി കലാമന്ദിര്‍ തന്നെയാണ് തകര, ഇതാ ഇവിടെ വരെ എന്നീ ചിത്രങ്ങളും പുനര്‍നിര്‍മ്മിക്കാന്‍ പദ്ധതിയിടുന്നത്. 
ലോകത്തിലെ ചലച്ചിത്ര വ്യവസായങ്ങളില്‍ ട്രെന്‍ഡ്/തരംഗം ഉണ്ടാകുന്നതും അതിനു പിറകെ സിനിമകള്‍ (കുറച്ചുനാളെങ്കിലും) പായുന്നതും പുതിയ കാഴ്ചയല്ല. ഹോളിവുഡും ബോളിവുഡും മുതല്‍ ടോളിവുഡും മോളിവുഡും വരെയുളള ചലച്ചിത്ര വ്യവസായം ഇതില്‍ നിന്നും മാറിനില്‍ക്കുന്നില്ല. ഈ പ്രവണത ഗുരുതരമായൊരു തെറ്റാണെന്ന് പറയാനാകില്ലെങ്കിലും ട്രെന്‍ഡുകള്‍ക്കു പിന്നാലെയോടുന്ന ചലച്ചിത്ര മേഖലക്ക് പ്രമേയപരമായും സാങ്കേതികപരവുമായ പുതുമയിലേക്ക് ഒരടി പോലും വളരാനാകുന്നില്ലെങ്കില്‍ എന്തു പ്രയോജനമാണ് ലഭിക്കുക. ലോകോത്തര നിലവാരമുളള ക്ലാസിക് സിനിമകള്‍ പിറവിയെടുത്തിട്ടുളള, ദേശീയ അന്തര്‍ദേശീയ തലങ്ങളില്‍ ശ്രദ്ധിക്കപ്പെട്ടിട്ടുളള നിരവധി സിനിമകള്‍ സൃഷ്ടിച്ച മലയാള ചലച്ചിത്ര വ്യവസായവും ചില ട്രെന്‍ഡുകള്‍ക്കു പിറകെ പോയി മുരടിക്കുന്ന കാഴ്ചയാണ് അടുത്ത കാലത്തായി കാണാനാകുന്നത്.
കലാപരമോ, പ്രമേയപരമോ, സാങ്കേതികപരമോ ആയ വളര്‍ച്ചയുടെ നേരിയ സൂചന പോലും നല്‍കാതെ മൃതിയടയുകാണ് മലയാള സിനിമയെന്ന് പറഞ്ഞാല്‍ അതിശയപ്പെടാനില്ല. ആവര്‍ത്തന വിരസതയും മടുപ്പുളവാക്കുന്ന അവതരണ രീതിയും കാലഹരണപ്പെട്ട സിനിമാ സങ്കല്‍പ്പങ്ങളും ഇഴ ചേര്‍ന്നതാണ് ഇന്നുളള സിനിമകള്‍. ഇതിനിടയിലും അന്തര്‍ദേശീയ,ദേശീയ തലത്തില്‍ ശ്രദ്ധിക്കപ്പെട്ട, പുരസ്കാരങ്ങള്‍ നേടിയ സിനിമകള്‍ ഉണ്ടാകുന്നുണ്ടെന്നത് മാത്രമാണ് ആശ്വാസത്തിന് വക നല്‍കുന്നത് (ട്രാഫിക്ക്, പ്രാഞ്ചിയേട്ടന്‍ ആന്‍റ് ദി സെയിന്‍റ്, ടി ഡി ദാസന്‍ ആറ് ബി, കോക്‌ ടെയില്‍, മേല്‍വിലാസം, ആദാമിന്‍റെ മകന്‍ അബു തുടങ്ങിയവ). മലയാള സിനിമയെ ബാധിച്ച ദുഷിച്ച പ്രവണതകളെ തുടച്ചുനീക്കാനായില്ലെങ്കില്‍ തുടങ്ങിയിടത്തുതന്നെ ഒടുങ്ങാനാകും മലയാള സിനിമയുടെ വിധി. 
ശക്തമായ പ്രതിപക്ഷവും അതിലേറെ ശക്തമായ വെല്ലുവിളികളും കേരളത്തില്‍ നേരിയ ഭൂരിപക്ഷത്തില്‍ അധികാരത്തിലെത്തിയപ്പോള്‍ മുതല്‍ യുഡിഎഫ് പ്രതീക്ഷിക്കുന്നതാണ്. എന്നാല്‍ അധികാരത്തിലേറി ഒരു മാസം മാത്രം പിന്നിടുമ്പോള്‍ തന്നെ ഇത്ര കലുഷിതമായ ഒരു രാഷ്ട്രീയ സ്ഥിതി കോണ്‍ഗ്രസും സഖ്യകക്ഷികളും പ്രതീക്ഷിച്ചിട്ടുണ്ടാകില്ല. നൂറു ദിവസത്തെ കര്‍മ്മ പരിപാടികളുമായി മികച്ച തുടക്കം പ്രതീക്ഷിച്ച യുഡിഎഫിന്‍റെ കൈയില്‍ നിന്നും കാര്യങ്ങള്‍ വഴുതി വീണത് പെട്ടെന്നായിരുന്നു.
നിലവില്‍ സര്‍ക്കാരിനെതിരെ ഉയരുന്ന പ്രധാന ആരോപണങ്ങളിലൊന്നാണ് സ്വാശ്രയ പ്രശ്നം. എം ബി ബി എസ്, മെഡിക്കല്‍ പിജി പ്രവേശനത്തിനുളള 50% മെറിറ്റ് സീറ്റുകള്‍ കൂടി കച്ചവടം ചെയ്യാനുളള സാമുദായിക സംഘടനങ്ങളുടെ താല്‍പ്പര്യത്തിന് വളംവെക്കുന്ന സര്‍ക്കാര്‍ നയത്തിനെതിരെ പലകോണുകളില്‍ നിന്നും ചോദ്യങ്ങളുയരുന്നുണ്ട്. ഹൈക്കോടതി കടന്ന് സുപ്രിം കോടതി വരെയെത്തിയിരിക്കുന്ന സ്വാശ്രയ, മാനേജ്മെന്‍റ് പ്രശ്നത്തില്‍ തൃപ്തികരമായൊരു നടപടി ഉമ്മന്‍ചാണ്ടി സര്‍ക്കാരിന്‍റെ ഭാഗത്തുനിന്നും ഉണ്ടാകാത്ത കാലത്തോളം സമര പരമ്പരകള്‍ നീളും. സ്വാശ്രയ വിദ്യഭ്യാസ കച്ചവടക്കാര്‍ക്ക് വിദ്യാഭ്യാസ നയങ്ങള്‍ തീറെഴുതാനുളള സര്‍ക്കാര്‍ തീരുമാനങ്ങള്‍ക്കെതിരെ നടന്നുവരുന്ന യുവജന-വിദ്യാര്‍ത്ഥി സംഘടനകളുടെ സമരം ഇതിനോടകം സംസ്ഥാനത്തിന്‍റെ പല ഭാഗങ്ങളില്‍ രക്തമൊഴുകുന്ന സമരമായി പരിണമിച്ചിട്ടുണ്ട്. ഉമ്മന്‍ചാണ്ടിയുടെ പൊലീസ് (അങ്ങനെ പറയുന്നതില്‍ തെറ്റിലെന്ന് തോന്നുന്നു. ഒരു മാസത്തിനിടെ മൂവായിരത്തോളം പൊലീസുകാരെയാണ് സ്ഥലം മാറ്റിയത്. നടപടി സ്റ്റേ ചെയ്ത ഹൈക്കോടതി വിശദീകരണവും തേടിയിട്ടുണ്ട്) സമരങ്ങളെ അടിച്ചൊതുക്കാന്‍ ശ്രമിക്കുന്നുണ്ടെങ്കിലും സമര വീര്യത്തിന് കുറവുണ്ടായിട്ടില്ല. സംസ്ഥാനത്തിന്‍റെ പല ഭാഗങ്ങളിലായി പുതിയ സമരങ്ങളും പ്രതിഷേധങ്ങളും ഉണ്ടാകുന്ന സാഹചര്യത്തില്‍, പൊലീസ് നടപടി എത്രത്തോളം ഗുണകരമാകുമെന്നത് സംശയകരമാണ്.
കേരളത്തില്‍, പൊലീസിന്‍റെ ക്രിമിനല്‍ സ്വഭാവം നിരവധി കേസുകളില്‍ വെളിപ്പെടുന്നതായി കഴിഞ്ഞ ദിവസം ഹൈക്കോടതി നിരീക്ഷിച്ചു. ക്രിമിനലുകള്‍ പൊലീസാകുന്നത് സാധാരണക്കാര്‍ക്ക് ദോഷം ചെയ്യുമെന്നും കോടതി അഭിപ്രായപ്പെട്ടു. പിഎസ്എസി വഴി കോണ്‍സ്റ്റബിള്‍ നിയമനത്തിന് അഡ്വൈസ് മെമ്മോ ലഭിച്ചെങ്കിലും ക്രിമിനല്‍ കേസിലുള്‍പ്പെട്ടതിനാല്‍ നിയമനം നിഷേധിച്ചതിനെതിരെ കാസര്‍കോട് നീലേശ്വരം സ്വദേശി എം. ശ്രീകുമാര്‍ സമര്‍പ്പിച്ച ഹര്‍ജിയിലാണ് ജസ്റ്റീസ് എസ്. സിരിജഗന്‍റെ ശ്രദ്ധേയമായ നിരീക്ഷണം.
മായ നിയമ വ്യവസ്ഥകളുണ്ടെങ്കിലും സംവിധാനങ്ങളും അവയുടെ പ്രവര്‍ത്തനങ്ങളും അതിനതീതമായാണ് നടക്കുന്നത്. പൊലീസിനുളളില്‍ ക്രിമിനല്‍ സ്വഭാവത്തെക്കുറിച്ച് അറിയാവുന്ന, അറിവ് വേണ്ട ഡിജിപി പോലും അതേക്കുറിച്ച് മൌനം പാലിക്കുന്നത് ഭരണഘടനാനുസൃതമായ ഒരു ജനാധിപത്യ രാജ്യത്തിലെ കൃത്യവിലോപമായി കണക്കാക്കണം.
പി എസ് സി നടത്തുന്ന കോണ്‍സ്റ്റബിള്‍ നിയമനങ്ങള്‍ക്കു മുമ്പായി പൊലീസ് വെരിഫിക്കേഷണ്‍ റിപ്പോര്‍ട്ടുകള്‍ സമര്‍പ്പിക്കേണ്ടതുണ്ട്. എന്നാല്‍, ഏതെങ്കിലും ക്രിമിനല്‍ കുറ്റത്തിന് ശിക്ഷിക്കപ്പെട്ടവര്‍ മാത്രമെ ഇതിലൂടെ റിക്രൂട്ട്‌മെന്‍റില്‍ നിന്നും ഒഴിവാക്കപ്പെടുകയുളളു. കുറ്റം സ്ഥാപിക്കാനാവാതെയോ, തെളിവുകളുടെ അഭാവത്തിലോ വെറുതെവിടുന്നവര്‍ മുതല്‍ ഉന്നത തലത്തില്‍ സ്വാധീനമുപയോഗിച്ച് കുറ്റ വിമുക്തരാകുന്നവരും ക്രിമിനല്‍ സംഘങ്ങളുമായി അടുത്തബന്ധം പുലര്‍ത്തുന്നവര്‍ വരെ നിയമനം നേടി ‘ഉത്തമ’ പൊലീസുകാരാകുന്നു. പൊലീസ് നിയമനത്തിനു മുമ്പും, പൊലീസിലെത്തിയതിനുശേഷമുളള സ്ഥാനക്കയറ്റം, സ്ഥലംമാറ്റം, പ്രത്യേക പദവി നല്‍കല്‍ എന്നിവക്കും മുമ്പായി ഉദ്യോഗാര്‍ത്ഥിക്ക്/ഉദ്യോഗസ്ഥന് ക്രിമിനല്‍ പശ്ചാത്തലമുണ്ടോയെന്ന് അന്വേഷിച്ചറിയുന്നതിന് ബന്ധപ്പെട്ട അധികാരികള്‍ക്ക് നിയമാനുസൃതമായ അധികാരമുണ്ട്. എന്നാല്‍ ശക്തമായ രാഷ്ട്രീയ ഇടപെടലുകളില്‍ ഈ മുന്‍കരുതല്‍ നടപടികളൊന്നും നടപ്പാകുന്നില്ലെന്നു മാത്രം.